ROXAS CITY – Nangin talk of the town sa karon sa Capiz ang pinasahi nga pamaagi sang pagcarolling sang mga katapu sang Tapaz PNP kaupod ang mga empleyado sang Municipal Social Welfare and Development Office.
Kinaandan na nga nagahatag sang kuwarta sa mga nagapangaroling sa balay, apang kabaliktaran ang natabo sa pag-carolling sang mga katapu sang Tapaz PNP, bangud sila ang nagahatag sang regalo sa bisitahon nga balay.
Sa interview sang Bombo Radyo Roxas kay Senior Inspector Edwin Luces, hepe sang Tapaz PNP, ginpahayag sini nga ginhimo nila ini nga estelo ba-se sa tema nga ” Awit at regalo Alay sa inyo sa Araw ng Pasko”.
Nagagamit man sang mga kalo nga nagaduag pula ang mga carollers nga pulis kag ginakantahan sang christmas songs ang mapadulungan nga balay nga ginakabig poorest of the poor sa komunidad.
Antes pa matapos ang ila nga pagkanta ginahatag na sang mga carollers ang ila nga regalo.
Suno kay Luces nga nakaandan na sini nga tagsa ka mag-abot ang holiday season, naga-carolling kag nagahatag sang regalo sa mga indigents sa diin tinutuyo sini nga mahatagan sila sang kalipay sa adlaw mismo sang Paskwa.
