Liwat nga ginapanawagan ang United Labor Panay sa Regional Tripartite Wages and Productivity Board 6 nga paga-aprubahan ang ila gin-file nga petition sa pagpataasan ang minimum wage sa Western Visayas.
Sa interview sang Bombo Radyo kay Elmer Forro, spokesperson sang United Labor Panay, iya ginpahayag nagakadapat nga pagadugangan sang P250 ang sweldo para sa mga minimum wage earners sa rehiyon.
Suno kay Forro, indi maka-igo ang P550 nga minimum wage para sa adlaw-adlaw nga kinahanglanon sang mga pumuluyo, ilabi na sa padayon nga pagsaka sang presyo sang mga balaklon.
Dugang pa sini, madamo nga mga pamilya ang yara sa idalom sang poverty threshold ukon nagaantos sa kapigaduhon bangod sa gamay nga kita sa taga adlaw.
Ginalantaw man sang grupo nga isa sa mga rason sang ila wage hike petition amo ang wage erosion, ukon ang pagnubo sang aktuwal nga balor sang peso bangod sa padayon nga pagsaka sang presyo sang mga nagapanguna nga balaklon.
