Nagpahayag sang pakig-unong kag kasubo ang United Nations (UN) sa Pilipinas kasunod sang makahalalit nga magnitude 7.8 nga linog nga nagtay-og sa Mindanao, kag nagpasalig sang suporta sa mga tikang sang gobyerno para sa rehabilitasyon kag pagbangon sang mga apektado nga komunidad.
Suno sa UN, padayon ini nga nagahatag kag naga-assess sang kabug-usan nga epekto sang kalamidad samtang nagapakigkoordinar sa national kag lokal nga mga otoridad, kag sa mga humanitarian partners agud matumod ang kalaparon sang halit kag masiguro ang husto nga pagresponder sa emerhensya.
Nagpaabot man sang pakig-unong ang organisasyon sa mga pamilya sang mga napatay kag sa mga komunidad nga naapektuhan sa pagkalaguba sang mga puluy-an, imprastraktura kag iban pa nga mga pasilidad bangud sang linog.
Gindayaw man sang United Nations ang mabaskog kag madasig nga pag-aksyon sang national kag lokal nga mga opisyal, lakip na ang dedikasyon sang mga first responders, medical personnel kag mga boluntaryo nga padayon nga nagapatigayon sang search, rescue kag relief operations sa mga lugar nga naapektohan sang kalamidad.
Ginpabutyag man sang UN ang importansya sang pagpalig-on sang disaster preparedness kag climate resilience bilang kabahin sang malawig nga rehabilitasyon kag pagbangon sang mga komunidad nga naapektuhan sang linog.
Padayon naman ang pagtinguha sang gobyerno kag nagkalain-lain nga organisasyon nga mahatagan sang nagakaigo nga bulig ang mga biktima samtang nagasugod ang rehabilitasyon sa mga lugar nga tuman nga naapektuhan sang malala nga linog.
