May daku sa gihapon nga risgo nga magamit sa kurapsyon ang Unprogrammed Appropriations sang 2026 national budget.
Sa interview sang Bombo Radyo kay Sonny Africa, Executive Director sang IBON Foundation, iya ginpahayag nga apisar indi hinali matandog ang amo nga pondo, may kontrol sa gihapon ang Presidente sa pagre-assign sini sa mga proyekto.
Suno pa kay Africa, ang unprogrammed appropriations ang makabig nga isa man ka sahi sang pork barrel bangud indi mabantayan ang alokasyon sini bisan pa nga ini ang pinakamanubo nga unprogrammed fund nga nabalhag humalin pa sang tuig 2019.
Pahayag pa niya, kinahanglan man nga tutukan sang gobyerno ang mga sektor kaangay sang edukasyon kag agrikultura nga ang naka-alokar nga pondo ang nagapabilin nga kwestyunable bangud wala sang pag-umwad sa bahin sini.
Nagapanawagan man ang natungdan sa tanan nga mag-ugyon sa pagpanindugan sang atun kinamatarong sa trasnsparency kag accountability sa 2026 national budget.
