ROXAS CITY- Masobra 80 na ka mga barangays ang nagapabilin nga ginabaha bangud sa wala untat nga pag-ulan sa Capiz.
Suno sa Provincial Disaster Risk Reduction and Management Office (PDRRMO)- Capiz nga 19 ka mga barangay ang apektado sa banwa sang Mambusao; 17 sa Pontevedra; tig-14 sa Sigma at Dao; 7 sa Cuartero; 5 sa Dumalag; 4 sa Maayon; samtang 1 naman sa Pontevedra, Capiz.
Sa interview kay PDRRMO action officer Esperidion Pelaez, ginpahayag sini nga posible madugangan pa ang numero sang mga ginabaha nga barangay bangud padayon sa gihapon ang pagbubu sang mamunog nga ulan.
Suno pa sa iya, indi naman maagyan ang pila ka mga alagyan sa probinsiya ilabi na ang karsada nga naga-angot sa probinsiya sang Capiz kag Aklan.
Kaangot sini, masobra 25 na ka mga pamilya ang gin-evacuate kag 170 ka mga pamilya naman sa banwa sang Mambusao ang indi maka-guwa sa ila balay bangud sa mataas nga lebel sang tubig.
Samtang, nagapabilin man sa gihapon nga kanselado ang mga biyahe sang mga sakayan pandagat bangud sa dalagkuan nga balod sa kadagatan.
Ginpasiguro naman sang lokal nga gobyerno sang probinsiya nga nakahanda sila nga magpalab-ot sang bulig sa mga apektado nga pamilya ilabi na ang yara sa mga evacuation centers.
