ROXAS CITY – Nagaguha sa pinakaulihi nga imbestigasyon sang mga otoridad nga ‘accidental firing’ ang natabo sa pagkamatay sang 24-anyos nga pulis nga taga Capiz nga nasapwan nga wala na sang kabuhi sa ila nga barracks sa 1st Negros Occidental Police Mobile Force Company (NOCPFMC) sa syudad sang Escalante.
Ini ang ginpahayag sang tagpamaba sang Negros Occidental Police Provincial Office nga si Police Major Edison Garcia sang mainterview sang Bombo Radyo.
Ginpahayag ni Garcia nga base sa consolidated report sang mga katapu sang Scene of the Crime Operatives (SOCO) kag Escalante City Police Station, aksidente nga nalukpan si Patrolman Richard Villasis sang Barangay Jaena Norte, Jamindan, Capiz sang iya nga service firearm.
Suno kay Garcia nga posible ginatinluan sang biktima ang iya nga armas apang aksidente ini nga naglupok.
Matandaan nga nag-angkon ang biktima sang isa ka pilas sa nawala nga dughan nga nag-igo sa iya nga baga kag korason nga ginkabangdan sang iya nga kamatayon.
Matandaan nga una nga ginpahayag sang mga kapulisan nga naghikog-patay ang biktima pinaagi sa pagluthang sa iya kaugalingon bangud sang tuman nga depresyon.
