ROXAS CITY – Patung patong nga kaso ang ipasaka sa 40-anyos nga bading nga nagmolestiya kag nagpatay sa 14-anyos nga solterito sa Barangay Tingui-an, Balasan, Iloilo.
Sa exclusive interview sang Bombo Radyo Roxas kay Chief Inspector Kenneth Paniza, hepe sang Balasan Police Station, ginpahayag sini nga kalakip sa ipasaka nga kaso batuk kay Raden Gonzales alyas Smile amo ang rape with homicide kag separado pa diri ang paglapas sa RA 9165 ukon Comprehensive Dangerous Drugs Act of 2002 kag RA 10591 ukon Comprehensive Law on Firearms and Ammunition matapos narekober sa posesyon sang suspek ang tatlo ka mga sachet sang shabu kag 38 caliber pistol.
Nagapati si Paniza nga mabakud na ang mga ebedensiya nga ila nga ginauyatan para mapasakaan sang patung patong nga mga kaso si alyas Smile kag dalayun na ini nga mabilanggo.
Samtang suno naman kay Pane Catalan, utod ni alyas Smile nga wala na sila sang labot pa diri bangud lunsay kahuy-anan lamang sang ila pamilya ang dala sini.
Ginpahayag pa sang ginang nga wala sila nagkulang sang pahanumdum sa utod, apang mas ginpili sini nga maghimo sang malain.
