Natalana nga ilubong subong nga adlaw sa sementeryo sang Pilar ang lapsag nga gin-alegar ginkuga-patay sang kaugaligon nga iloy.
Ginahikut na sang pamilya ni alyas Lyn ang kinahanglanon nga dokumento agud ma-proseso ang pagpalubong sa lapsag nga lalaki.
Ginpahayag ni Toto, magulang sang 21-anyos nga iloy nga doble ang ila kasubo nga nabatyagan sa karon bangud napatay ang iya hinablos kag ginpasakaan sang kaso nga infanticide ang iya manghod nga naka-hospital arrest sa karon sa Roxas Memorial Provincial Hospital.
Ginapanindugan sa gihapon ni Toto nga wala ginkuga sang utod ang bag-o bun-ag nga lapsag bangud sa pagkamatood naghimo pa ini sang pamaagi agud mabuligan nga mabuhi ang iya anak.
Apang posible nga napatay ang lapsag bangud sa pagbalimbod sang umbilical cord ukon pusod sini sa iya nga liog.
Ginapatihan sang pamilya ni Lyn ang gintuad sa ila sang nasambit nga iloy nga nakabugtaw na lamang ini nga nakaguha na sa iya ang lapsag sa diin sang makita nga wala nagahibi ang bata, gilayon niya ini nga ginpunasan.
Sa karon nagapanawagan ang pamilya ni Lyn sa mga otoridad nga liwat imbestigahan ang natabo, bangud mabaskog ang ila nga pagpati nga nagasugid sang matood ang ila himata.
