ROXAS CITY – Ginkumpirma sang iloy sang suspek nga naglabo gamit ang wasay tobtob mapatay nga nakita sini nga nagbaylo sa isa ka bampira ang kaatubang nga tiyo nga kaupod sa ilimnan rason nga iya ginwasay.
Sa interview sang Bombo Radyo kay Mrs. Libertad Cerilo, iloy sang suspek nga si Rodrigo Cerilo nga napatay man matapos luthangon kag lampusan sang matig-a nga bagay ang nawong nga nabatian sini nga nagbuhi sang tinaga ang anak nga nangin bampira na ang iya nga tiyo.
Kasunod ang pagwasay sini kay Antero Suza nga nagapahuway sa duyan.
Gilayon nga napatay si Suza bangud sa naangkon nga pilas sa butkon, tiil, liog sa diin nabilin pa ang wasay sa dughan sang tiyo sang nagguwa sa balay si Rodrigo para lagson naman sang sanduko ang pakaisa ni Ronald Cerilo, nga kaupod nila nga naga-inum sa balay sang iloy.
Ginpahayag pa sang ginang nga samtang ginalagas ni Rodrigo ang pakaisa nga si Ronald hinali na lamang nakabati sila sang sunod sunod nga lupok sang armas tobtob nakita na lamang ang duguan nga bangkay sang anak nga may igo sang bala sa ulo kag madamo nga lagub sa lawas sa diin kasubong nagupi ang nawong sini bangud sa pagpukpok sang matig-a nga bagay.
Gin-ako sang ginang nga nasubuan ini sa natabo sa magtiyo bangud wala sang may gin-awayan ang duha nga tuman ka lapit sa isa kag isa.
Apang bangud sa impluwensiya sang ilimnon, nangin mitsa pa ini sang ila kabuhi.
