ROXAS CITY – Gindepensahan sang hepe sang Ivisan PNP nga si Senior Inspector Leomindo Tayupon ang kaugalingon batuk sa mga akusasyon sa iya kasunod sang pagpalutok sang armas sa Barangay Poblacion, sa banwa sang Jamindan, Capiz.
Sa exclusive interview sang Bombo Radyo Roxas kay Tayupon, gin-ako sini ang pagpalupok sang armas apang gin-athag nga tinutuyo sang iya aksyon nga mapunggan ang paglala sang kinagamo sa tunga sang duha ka grupo nga hana na nga maggabut sang pusil.
Suno pa sa opisyal nga sa duta sini ginpalupok ang pusil para wala sang maigo.
Nagapanindugan man ini nga indi siya hubog sang magluntad ang insedente bangud natabuan nga nag-agi lamang ini sa guwa sang bulangan sang mabatian ang pagpangayo sang bulig sang isa ka nagabaligya bangud sa kinagamo sa tunga sang grupo ni Kagawad Advincula sang Barangay Poblacion, Jamindan kag anay Kagawad Presno sang banwa sang Mambusao, Capiz.
Aminado man si Tayupon nga wala siya nakapanawag sa mga pulis sa Jamindan Police Station, bangud para sa iya immediate action ang kinahanglan sa nasambit nga sitwasyon.
