ROXAS CITY – Gin-remit na sa talatapan sang Bureau of Jail Management and Penology (BJMP) Roxas City Jail sa Barangay San Jose, Roxas City si Lito Burias, 36 anyos sang Sitio Arcabalo, Barangay Bolo, Roxas City nga isa sa anom ka mga indibidwal nga yara sa likod sang FOREX investment scam sa Capiz.
Ini matapos nga nadakpan si Burias sa Barangay Poblacion, President Roxas matapos ini ang ginserbihan sang warrant of arrest sa kaso sini nga Syndicated Estafa.
Ang warrant of arrest batuk kau Burias ang ginpirmahan kag ginpapanaog ni Judge Kristine Tiangco-Vinculado sadtong Agosto 28, 2019.
Wala sang ginrekomendar nga piyansa ang korte para sa temporaryo nga kahilwayan sa akusado.
Matandaan nga una na nga nadakpan sang mga kapulisan ang ginbansagan nga FOREX investment scam queen nga si Lourdes Baarde sang Barangay Baybay, Roxas City kag Joel Domayan sang Quezon City.
Kalakip man sa anom ka mga indibidwal nga akusado sa kaso nga Syndicated Estafa amo sanday Rachel Chavez kag Rebecca Venturado sang Mandaluyong City kag Gerlinski Bravo sang Alcazar Subdivision, Roxas City.
