SIGMA CAPIZ – Ginkumpirmar sang isa ka Barangay Kagawad ang rason sang pagpangbuno sang bana sa iya kaugalingon nga asawa sa Barangay Mianay, banwa sang Sigma.
Matandaan nga ginkilala ang biktima kay Lorna Donasco, 50-anyos, samtang ang ginapahayag suspek ang ginkilala kay Eduardo Donasco, 60-anyos, lunsay mga residente sang nasambit nga lugar.
Sa interview sang Bombo Radyo kay Barangay Kagawad Helen De Justo, VAWC, ginpahayag nga personal nga kilala sini ang biktima nga si Lorna Donasco bangud anay kabulig ini sang iya nga utod sa maynila.
Pahayag pa sini nga madugay na nga masami nagadangop ang mag-asawa sa ila talatapan bangud masami ini nga naga-away kag pagpangimon ang gin-umpisahan sang ila nga away.
Nagalaum si amo nga Barangay Kagawad nga okay na ang duha ka mag-asawa bangud wala naman ini nabalitaan nga naga-away.
Apang nakibot na lamang ini sa nahibaluan nga gin-ayad buno ni Eduardo ang iya nga asawa kag matapos ini nga ginbuno sang kutsilyo ang asawa ginbuno man sini ang iya kaugalingon.
Mahibaluan nga base sa panaysayon sang bata sang biktima kag suspek, nagbinaisay ang iya sini mga ginikanan tubtob nga gin-ayad buno sang iya sini amay ang iloy gamit ang kutsilyo.
Bangud sa natabo, gilayon ini nga nagpangayo sang bulig sa mga kapulisan agud mapadangat sa Dao District Hospital ang biktima samtang sa Mambusao District Hospital naman ang suspek samtang naka-ungot pa ang kutsilyo nga gingamit man mismo sa pagbuno sa iya kaugalingon.
Sa karon padayon nga ginatatap sa ospital ang amo nga mag-asawa.
