ROXAS CITY – Malimpyo kag wala sang rekord sa Barangay ang 18-anyos nga lalaki nga ginluthang sang tatlo ka mga kalalakinhan sa Arnaldo Boulevard, Barangay Baybay sini nga syudad.
Ini ang ginkumpirmar ni Barangay Kagawad Rodolfo Artuz, sang Brgy. Tanza Gua sang mainterview sang Bombo Radyo.
Suno kay Artuz, masami nga nagatinir si Pipo Arroyo sa iya mga barkada kag tumulagsahon lang magpauli sa iya nga lola.
Aminado man ini nga madamo sang barkada si Pipo kag nagapadulong sa ila balay nga indi man kilala sang lola.
Dugang pa sang opisyal nga wala man nalakip ang biktima sa drug list monitoring sang barangay.
Matandaan nga ba-se sa panaysayon sang kaupod sang biktima samtang nagabiyahe sila nga mag-abyan sakay sa motorsiklo sang ginparahan sila sang tatlo ka mga motorsiklo sakay ang tatlo ka mga kalalakinhan nga bitbit kada isa sang armas-luthang.
Gilayon naman nagpundo ang mag-abyan kag nagsiling ang biktima “wala ko da ya sala” kag gilayon nga nagdalagan, apang gintiro ini sa tiil, tubtob nga natumba sa atubang sang pink hotel kag nag-angkon sang daplis sa natuo nga mata, kag kili-kili.
Sa karon, yara na si Pipo sa istable nga kondisyon kag padayon nga ginamonitor.
