ROXAS CITY – Gindepensahan sang iya nga kaingod-balay ang mister nga ginaalegar nagpanghimulos sa iya duha ka mga anak nga dalagita sa isa ka barangay sa siyudad sang Roxas.
Suno kay ginang Gina, ginapanindugan sini nga wala sang kamatuoran ang ginaalegar sang mag-utod sa ila nga amay.
Suno sa ginang, imposible nga himuslan sang suspek ang duha sini ka mga anak bangud sa kaingod-balay ang mag-utod nagakatulog bangud tuman ka gamay ang ila nga balay.
Posible suno sa ginang nga nagahimo-himo lamang sang estorya ang mag-utod bangud kilala ang mga ini nga butigon sa ila lugar.
Gindugang pa sini nga malaka magpauli ang mag-utod sa ila nga balay bangud lagawan ang mga ini.
Matandaan nga ginpahayag sang mag-utod nga sanday Marie, 11 anyos kag Rina, napulo ka tuig ang edad nga makapila ka beses ang mga ini ginhimuslan sang ila amay sa ila nga balay.
