Hustisya ang ginasinggitan sang pamilya sang 25-anyos nga babaye nga ginpatay sang iya pakaisa nga karelasyon sa Barangay Culajao, sining syudad.
Ginpahayag ni Romulo Buñi, amay sang biktima nga si Ronalyn Buñi nga wala gid sila mag-expektar nga mahimo patyon ni Salvador Pin ang biktima bangud maayo man ang ila pagtamdanay kag maayo man ang ila pag-amuma diri.
Sa pagkamatood nga kasubong sa anak ang pagtrato sini sa suspek sa diin ginatimplahan pa niya ini sang kape nga wala sini nahimo sa iban nga mga kabataan kun magkadto sa ila balay.
Apang aminado si Tatay Romulo nga bisan paano nagaduda ini sa iya anak kag suspek bangud may insedente nga nakita sini ang duha nga tuman ka lapit.
Suno sa amay nga iya ginsaway kag ginhambalan nga magdistansiya sa isa kag isa bangud lunsay pamilyado na sila kag indi maayo tan-awon nga tam-an sila kalulot sa isa kag isa.
Bangud sa nadangatan sang iya anak, luyag sang pamilya sang biktima nga mapasakaan sang kaso ang suspek agud mahatagan sang hustisya ang ginhimo nga krimen.
Samtang nahibaluan nga naglisensiya ang biktima nga mabakal sang sapatos sang adlaw nga nagbiya ini sa ila balay sa diin may dala ini nga kuwarta nga ginabulubanta nagalab-ot sa P7,000.
