Emosyunal ang pamilya sang 21-anyos nga iloy nga gin-alegar nagkuga-patay sa kaugalingon nga bag-o bun-ag nga lapsag sang makalab-ot sa ila ang balita.
Sa exclusive interview sang Bombo Radyo kay Toto, magulang ni alyas Lyn ginpahayag sini nga nakibot sila sa balita, apang nagapanindugan nga indi magpati ang ila pamilya nga mahimo sang iya manghod nga patyon ang kaugalingon nga anak.
Suno kay Toto nga mapinalanggaon sa mga bata si Lyn kag wala sa iya personalidad nga makahimo sang kasubong nga krimen.
Ginkumpirma man sini nga nakatawag pa sa ila ang utod kag na-estorya sa ila ang natabo.
Ginpahayag ni Toto nga ba-se sa panaysayon sa ila ni Lyn nga wala na sang kabuhi ang lapsag sang nagguha sa iya taguangkan sa diin sang makita sini nga wala na nagahibi ang bata, iya ini ginpunasan, apang wala na ini nagaginhawa.
Ginsiling nga nahimo lamang ni Lyn nga masulod sa eco bag kag drawer sa iya hulot ang patay nga lapsag bangud sa kulba.
Ginpanindugan man ni Toto nga plano sang iya manghod nga isugid sa iya employer ang natabo, apang nagahulat lamang sang tiyempo, bangud natabuan nga may okasyon sadto ang pamilya nga iya gintrabahuan.
Aminado ang magulang nga wala sila ideya nga nagabusong ang manghod bangud wala ini nagasugid sa ila.
Nahibaluan nga lima ka bulan pa lamang nga nagatrabaho si Lyn sa isa ka pamilya sa Barangay Baybay bilang kabulig sa balay.
Sa iya nga pagtrabaho sa amo nga pamilya, makaduha ka beses pa lamang ini nga nakapauli sa ila balay.
Ikalima sa anum ka mag-utod si Lyn nga nag-upod sa kilala sang iya iloy para magpangita sang trabaho sa Roxas City.
