ROXAS CITY – Positibo ang sports coordinator sang Department of Education (DepED) Capiz Schools Division nga madugangan pa ang makuha nga medalya sang mga atleta gikan sa delegado sang Western Visayas Regional Athletic Association (WVRAA) sa nagapadayon sa karon nga Palarong Pambansa 2018 sa Vigan, Ilocos Sur.
Ini matapos nakahatag na sang tatlo ka bulawan nga medalya ang mga atleta gikan sa probinsiya sang Capiz sa delegado sang Rehiyon Sais ba-se sa partial kag unofficial medal standing sa nagapadayon nga Palaro.
Nakuha sang 18 anyos nga si Daisy Mae Desu, tumandok sang Astorga, banwa sang Dumarao, ang bulawan nga medalya sa Arnis-Secondary Category.
Nakakuha man sang gold medal si Lianna Yvette Sabando gikan sa siyudad sang Roxas sa Taekwondo-Elementary Girls Kyorugi Category.
Samtang ginpangunahan naman ni Alleah Dominique Yosalan ang Taekwondo-Secondary Girls sa diin nakakuha man ini sang bulawan nga medalya.
Suno kay Reteracion, magaserbi nga inspirasyon sa iban pa nga atleta sa Western Visayas ang nalab-utan sang mga gold medalist gikan sa rehiyon.
Gindugang pa sini nga lunsay ganado sa karon ang mga atleta gikan sa Rehiyon Sais kag determinado nga madaog ang ila tagsa ka mga hampang agud makadala pauli sang medalya sa ila tagsa ka mga probinsiya.
