ROXAS CITY – Dalayon na nga ginbawian sang kabuhi ang 13 anyos nga solterito samtang ginabulong sa isa ka pribado nga ospital matapos na-tetanus kasunod sang pag-circum sang ginapatihan peke nga doktor sang Roxas Memorial Provincial Hospital.
Ini ang ginkompirmar mismo sang lola sang biktima nga si Margarita Baarde sang mainterview sang Bombo Radyo.
Suno sa ginang, ginkompirmar sang attending physician nga tetanus-infection ang gintunaan sang kamatayon sang iya nga apo nga si Telmo.
Nagahilibion nga nagapangayo sang hustisya ang ginang sa kamatayon sang iya apo kag naga-apelar sa pamunuan sang RMPH nga pasabton ang ginapahayag peke nga doktor nga si Dominggo Brillo nga responsable sa natabo.
Matandaan nga sadtong Abril 6 sang gin-circum ni Brillo ang nasambit nga solterito sa sulod sang Histopathology Laboratory sang nasambit nga ospital.
Apang naglain ang pamatyag sang biktima makaligad ang pila ka mga inadlaw kag nangin kritikal sa sulod sang Intensive Care Unit.
Ulihi na sang nahibaluan sang pamilya sang solterito nga nga indi doktor si Brillo kag indi man ini otorisado sang ospital nga magpamaltak bangud pinuno ini sang mga institutional workers (IW) sa ospital.
