ROXAS CITY –Yara na sa kostodiya sang Women and Children Protection Desk (WCPD) sang President Roxas Municipal Police Station ang 17-anyos nga solterito nga ginatudlo nagbuno sa duha ka mga kalalakinhan sa isa ka okasyon sa Poblacion, President Roxas kaina sang kaaganhon.
Natigayon nga madakpan sang mga pulis si alyas Bebe Denaga sang Poblacion Swa, sang amo nga banwa matapos ginreport sa mga otoridad ang insedente kag nagpatigayon sang hot pursuit operation.
Ginpahayag ni Police Master Sergeant Ham Castillano, imbestigador sang President Roxas PNP nga nagaguwa sa imbestigasyon nga imbitado sa isa ka okasyon ang suspek kaupod ang tatlo ka barkada, subongman ang duha ka mga biktima nga sanday Fernando Buendia 18-anyos kag 17-anyos nga si Argie, lunsay mga residente sang Barangay Dulangan, Pilar.
Ginaalegar nga nakursunadahan sang suspek ang mga biktima gani sang nabatyagan sang duha nga kasubong nagalain na ang dalagan sang estorya, ginpakamaayo sang mga ini nga magbiya sa lugar.
Apang wala ginalauman sang mga biktima nga ginpangita sila sang suspek nga nagpa-upod sa iya barkada.
Sang makita sini ang mga biktima nga yara sa kalduhan, nagpanaug ini sa ginasakyan nga motorsiklo nagpalapit sa duha kasunod ang pagbuno gamit ang icepick.
Nahibaluan nga nag-angkon sang pilas sa kilid ang menor de edad nga si Argie nga yara karon sa Bailan District Hospital samtang yara naman sa Roxas Memorial Provincial Hospital si Fernando nga ginbuno sa kilid kag tiyan.
Samtang suno kay Castillano nga matapos nagtahaw ang kahulugbon sang suspek, naghinulsol ini sa iya ginhimo.
