ROXAS CITY – Boluntaryo nga nagsungka sa Traffic Management Unit (TMU), ang tricycle driver nga nagsukot sang P400 sa magtiya gikan sa Roxas City Airport padulong sa St. Anthony Hospital.
Ginkilala ang driver kay Reman Aguirre, 28-anyos residente sang Barangay IX, sini nga syudad.
Sa interview sang Bombo Radyo kay Gonzalo Andrada Jr., pinuno sang TMU suno diri expired na ang mga dokumento nga ginpakita ni Aguirre kaangay sang lisensya kag OR/CR.
Suno kay Andrada, wala nagabiyahe si Aguirre apang nalabayan sini ang magtiya nga nagapangita sang masakyan kag ginpasakay na lang ini kag ginsukot sang P400.
Aminado naman si Aguirre, nga sala ang iya ginhimo kag nagapangayo ini sang pasaylo sa magtiya kag naapektuhan man ang iban pa nga mga tricycle drivers.
Naglab-ot sa P2,500 ang penalidad ni Aguirre bangud sa bayolasyon samtang ginkustudiya sang TMU ang amu nga traysikol.
