ROXAS CITY – Totally burned ang isa ka ugahan ukon payag nga nagaserbi nga palahuwayan sang mga nagabulad sang uga sa Barangay Dumolog, Roxas City.
Ang nasambit nga payag ang ginapanag-iyahan ni Joseph Aleligay 53-anyos sang nasambit nga lugar.
Suno kay Aleligay nga samtang nagakatulog ini upod ang iya pamilya hinali na lamang ini nakabugtaw matapos nga ginalamon na sang kalayo ang ila nga payag nga extension man sang ila balay.
Ginaalegar ni Aleligay nga posible nga upos sang sigarilyo ni alyas Ramon pakaisa sang iya nga misis nga ginhaboy sa ugahan ang gintunaan sang nasambit nga sunog.
Nahibaluan nga yara sa idalom sang impluwensya sang makahulubog nga ilimnon si alyas Ramon kag ginapahayag nga nag CR ini sa amo nga payag.
Bangud diri, madasig nga ginlamon sang kalayo ang amo nga payag kag ugahan subongman ang pila ka mga appliances sang pamilya Aleligay.
Padayon naman ang imbestigasyon nga ginapatigayon sang mga katapo sang Bureau of Fire Protection ukon BFP (Roxas City Fire Station) sa nasambit nga sunog.
