Matapos ang duha ka adlaw sang negosasyon sa London, gin-anunsyo ni US President Donald Trump nga may nakasugtanan na nga “deal” ang Estados Unidos kag China agud pahupayon ang tensyon sa taripa sang duha ka mga pungsod.
Suno kay Trump, nagpasugot ang China nga liwat sila nga maga-supply sang magnets kag rare earth metals sa US, samtang ginbawi man sang Amerika ang pagpamahog nga nagabawal sang visa para sa mga estudyante nga Chinese.
Ginsiling ni Trump nga ang kasugtanan ang natapos na kag “subject to final approval” nagikan sa iya kag sa Chinese President nga si Xi Jinping. Subong man, limitado pa ang mga detalye sa kasugtanan, nga kabahin lamang sang mas malapad nga truce nga una nga ginplastar sang Mayo.
Suno sa mga opisyal sang US kag China, nakahimo sila sang framework para ipatuman ang mga nakasugtanan sa Geneva kag sa nangin istoryahanay sa telepono nanday Trump kag Xi sang Hunyo 5, 2025.
Samtang, gin-anunsyo man ni Trump nga magapaguha siya sang mga bag-o nga tariff terms sa sulod sang isa tubtob duha ka semana, antes ang July 9 deadline. Suno man kay US Treasury Secretary Scott Bessent, posible nga palawigon pa ang suspension sang iban pa nga taripa samtang nagapadayon ang pagpakighinala sa iban pa nga mga punsod.
Madumduman nga ang nasambit nga isyu ang tuga sa reklamo sang Amerika nga masyado kahinay ang China sa pagpaguha sang rare earth exports, samtang ginpakamalaot man sang Beijing ang pagdumili sang Estados Unidos sa pagsulod sang teknolohiya kaangay sang AI kag semiconductors.
Apisar positibo ang tono sang magkatuhay nga bahin, gin-athag sang mga eksperto nga sa gihapon indi pa ini ang perpekto nga trade agreement suno kay Terry Haines sang Pangaea Policy.
