Gin-anunsiyo sang Amerika ang plano nga kasugtanan sa Israel nga pagpadala sang mga armas nga nagabalor sang $8 billion.
Kalakip sa plano nga arms sale amu ang AIM-120C-8 AMRAAM air-to-air missiles para sa fighter jets, 155mm artillery shells, small diameter bombs, 500-pound warheads, bomb fuzes kag iban pa nga equipment.
Ginpresentar sang US State Department ang nasambit nga kasugtanan bilang isa ka tikang agud suportahan ang long time security sang Israel pinaagi sa liwat nga pagsuplay sang stocks sang mga critical munitions kag air defense capabilities.
Suno sa isa ka US official, gin-athag ni President Joe Biden nga kinamatarong sang Israel nga depensahan ang mga pumuluyo sini, sandig sa international law kag international humanitarian law kag para mapunggan ang agresyon gikan sa Iran kag sa mga proxy organizations sini.
Ginpahayag man sini nga padayunon sang US ang paghatag sang mga nagakaigo nga bulig para sa depensa sang Israel.
Sa karon naka-pending pa ang pag-aprubar sang US Congress para sa nasambit nga arms deal sa Israel.
Ginhimo sang Biden administration ang amu nga proposal pila ka semana antes ang nabilin nga mga adlaw sa termino ni President Biden antes ang inagurasyon ni President-elect Donald Trump sa Enero 20, 2025.
Samtang, nagapangatubang naman ang US sa mga pagpakamalaot bangud sa paghatag sini sang military aid para sa Isael sa tunga sang nagataas nga numero sang mga napatay nga Palestinhon sa tunga sang wala pa gihapon natapos nag giyera sa Gaza kun sa diin nagdangat na sa masobra 45,650 ang napatay kadam-an amu ang mga kababainhan kag mga kabataan sumugod sang nag-umpisa ang October 7 attack.
