Gin-anunsiyo sang Amerika ang una nga pag-atras sang Israeli forces sa south Lebanon sa idalom sang ceasefire deal sa tunga sang Israel kag Hezbollah sang Miyerkules.
Sa isa ka statement, ginpahayag sang US Central Command (CENTCOM) nga present ang command leader nga si General Erik Kurilla sa pag-implementar kag pagbantay sa headquarters sang nagligad nga adlaw sa tunga sang nagapadayon nga una nga pag-atras sang Israeli Defense Forces kun sa diin pagabuslan sila sang Lebanese Armed Forces sa Al-Khiam, Lebanon bilang kabahin sang ceasefire agreement.
Suno kay Gen. Kurilla, importante ang una nga tikang nga ini sa pagpatuman sang malawig nga pag-untat sang giyera kag pagplastar sang pundasyon para sa padayon nga progreso.
Ginpahayag naman ni Lebanese Prime Minister Najib Mikati nga ang pag-istasyon sang mga tropa sa Khiam kag Marjayoun areas ang nagapakita sang isa ka importante nga tikang padulong sa pagpabaskog sang deployment sang ila kasuldaduhan sa southern Lebanon sa pagpatuman sang untat-lupok.
Samtang, sa bahin naman sang Israeli military, ginpahayag sini nga nakumpleto na sang 7th Brigade ang ila nga misyon sa Khiam sa southern Lebanon.
Ginpahayag man sang Israeli military sa isa ka statement nga naka-deploy ang mga suldado sang Lebanese Armed Forces sa lugar kaupod ang UNIFIL nga isa ka UN peacekeeping mission sa lugar sandig sa ceasefire deal kag sa koordinasyon sang Amerika.
Matandaan nga halos isa ka tuig nga nagbaylohanay sang cross-border strike ang Israel military kag militante nga Hezbollah sa Lebanon nga natabo isa ka adlaw matapos ang pagsalakay sang kaalyado sang Hezbollah nga Hamas batuk sa Israel sadtong Oktubre 7, 2023.
Sang damlang lang, sang Nobyembre 27 sang mangin epektibo ang ceasefire sa tunga sang Israel kag Hezbollah.
Samtang, nakatalana naman nga i-atras sang Hezbollah ang ila nga pwersa sa naaminhan sang Litani river, 30 kilometros gikan sa border kag gub-on ang ila nga military insfrastructure sa southern Lebanon.
