Ginpabakod sang Estados Unidos sang America ang ila “ironclad” ukon malig-on nga mutual defense commitment sa Pilipinas.
Sa mensahe ni US Secretary of State Marco Rubio, iya ginpalab-ot ang iya panamyaw sa mga Pilipino kag ginpadaku ang mabakod nga pag-alyansa sang Pilipinas kag Amerika nga nagsugod sa panahon sang World War 2 kag ginpabaskog ang pila ka dekada nga diplomatic relationship.
Ginsambit man ni Rubio ang palaabuton nga selebrasyon sang ika-80 nga tuig sang diplomatic relations sa tunga sang duha ka pungsod kag ang ika-75 nga anibersaryo sang 1951 Mutual Defense Treaty nga nagaserbe nga pundasyon sang ila pagbinuligay sa patag sang seguridad.
Suno sa opisyal, ang Pilipinas nagapabilin nga kaupod sang Amerika sa pagmentinar sang bukas kag hilway nga Indo-Pacific Region, kadungan sang padayon man nga pagpadalom sang ila pag-updanay sa ekonomiya pinaagi sa Luzon Economic Corridor kag iban pa nga mga programa.
Sa pihak nga bahin, nagalaum naman ang Amerika nga mas mapasangkad pa gid ang pagbinuligay sang duha ka pungsod agud mapasanyog ang kalinong, seguridad, kag kauswagan sa masunod nga mga tinuig.
