TEHRAN-Ginpangguba sang United States military ang lima ka Iranian oil tankers matapos gin-atake sang Iran sang ballistic missiles ang isa ka US Navy warship sa sulod sang duha ka magkasunod nga adlaw.
Suno sa US Central Command (CENTCOM), ginmanduan anay sang mga pwersa sang Amerika ang mga crew sang mga tanker nga magbiya sa ila mga barko antes ini gin-target kag gin-render nga indi na magamit.
Suno pa sa CENTCOM, ini ang ikaduha nga tion sa sulod sang wala pa isa ka semana nga nag-target ang US sang Iranian oil tankers bilang sabat sa mga pag-atake sang Islamic Revolutionary Guard Corps o IRGC batok sa mga barko sang US Navy.
Ginpahayag ni US Secretary of State Marco Rubio nga magapadayon ang pag-target sang ila pwersa sa Iranian oil tankers sa tion nga magpadayon ang pag-atake sang Iran sa mga barko sang Amerika.
Samtang, nagpaandam ang Iran nga targeton sini ang mga oil tankers nga yara sa gwa sang Kuwait kag Bahrain, nga mga kaalyado sang United States.
Una na nga ginpahayag sang CENTCOM nga tatlo pa ka Iranian crude carriers ang ginpaguba sang US forces sang Sabado matapos ang gin-alegar nga pag-atake sang Iran sa isa ka US aircraft carrier kag guided missile destroyer.
Sa pihak nga bahin, ginpahayag man sang CENTCOM nga isa ka underwater drone sang US ang nag-malfunction samtang nagapatigayon ini sang operasyon sa rehiyon. Ini ang gin-claim sang Iran nga nakuha sang ila pwersa sa entrada sang Strait of Hormuz, apang wala kumpirmaha sang Amerika kon nadakpan gid ini sang Iran.
