Gin-anunsyo ni U.S. Secretary of State Marco Rubio nga ipatuman sang Estados Unidos ang visa ban batok sa mga dumuluong nga opisyal nga ginaalegar imbolbado sa pagpugong sang kahilwayan sa pagpahayag sang mga Amerikano, ilabi na sa internet.
Bisan pa nga wala sang ginhingadlan nga pungsod ukon indibidwal, ginpahayag ni Rubio nga ang bag-o nga polisa nagatuyo nga punggan ang mga dumuluong nga opisyales sa pagdikta sang content moderation sa US based tech platforms pareho sang Meta. Suno sa iya, indi mabaton nga ang mga dumuluong ginapahog nga dakpon base sa mga post sa social media nga naghalin sa sulod sang Amerika.
Ang lihok nagakatabo sa tunga sang nagasaka nga tensyon sa tunga sang U.S. kag European Union, ilabi na sa pagpatuman sang EU Digital Services Act — isa ka kasuguan nga ginpakamalaut sang mga opisyal sang U.S. bilang isa ka sahi sang censorship.
Suno sa mga opisyal sang Estados Unidos, ang bag-o nga polisa kabahin sang mas malapad nga tikang sa pagdepensa sang kahilwayan sa pagpahayag sa atubang sang nagasangkad nga mga pagsulundan sa luwas sang pungsod.
Ang mga tiglawas gikan sa U.S. State Department nagapakighambal man sa karon sa mga gobyerno sang France kag Ireland nahanungod sa isyu.
