Nagpadala sang bulig ang Estados Unidos sa mga pumuluyo sang Manay, Davao Oriental nga naapektuhan sang asud-asod nga linog nga may kabaskugon nga magnitude 7.4 kag 6.8 sang tinalikdan nga Biyernes.
Suno sa U.S. Embassy, kalakip sa ila ginpadala nga ayuda ang masobra 137,000 ka mga food packs para sa mga pamilya kag 500 ka mga emergency shelter kits. Suno kay U.S. Ambassador MaryKay Carlson, padayon sila nga nagakoordinar sa Department of Social Welfare and Development (DSWD) agud mahatagan sang igtalupangod ang iban pa nga kinahanglanon sang mga apektado nga residente.
Samtang, nagpahayag man sang pagpakig-unong ang nagkalain-lain nga pungsod. Sa isa ka pahayag, ginsiling ni Japanese Ambassador Endo Kazuya nga nagapakigbahin ang Japan sa mga Pilipino sa kasubong nga tion sang pagtilaw.
Ginpahayag man ni Australian Ambassador Marc Innes-Brown ang pagdayaw sang Australia sa kabakod kag madasig nga pag-aksyon sang mga Pilipino sa pihak sang mga naglabay nga mga kalamidad.
Nagpalab-ot man sang pagpakig-unong ang Chinese Embassy sa mga napatay, kag nagpahayag sang handom para sa madasig nga pagbangon sang bilog nga Davao Region.
Base sa report sang National Disaster Risk Reduction and Management Council (NDRRMC), naglab-ot na sa walo (8) ang kumpirmado nga napatay kag 395 ang napilasan bangud sang linog.
Samtang, ginabulubanta yara sa P100.25 milyon ang balor sang halit nga ginbilin sa mga imprastruktura sa Davao Region kag CARAGA, kalakip na ang 273 nga mga naguba nga pasilidad.
