Ginpaandaman sang Estados Unidos ang Oman batok sa posible nga pagpatuman sang bayad ukon toll sa mga barko nga magaagi sa Strait of Hormuz Suno sa US, pagasilutan nila ang bisan sin-o nga magbulig ukon magkooperar sa amo nga plano.
Sa post ni U.S. Treasury Secretary Scott Bessent sa X ukon Twitter anay, nagsiling ini nga agresibo nga aksyunan sang Amerika ang mga indibidwal ukon grupo nga may kaangtanan sa pagpatuman sang toll sa Strait of Hormuz.
Samtang, nagpahayag naman si U.S. President Donald Trump nga wala sing pungsod ang dapat magkabuot ukon magkakontrol sa Strait of Hormuz bangud internasyonal nga katubigan ini kag importante nga agyanan sang langis sa kalibutan.
Wala pa man sang opisyal nga pahayag ang Oman nahanungod sa plano nga pagkontrol sa Strait upod sa Iran. Apang ginakilala nga padayon ang ila pakighambal sa Iran para sa kahilwayan sang pagbiyahe sang mga barko sa lugar.
Ang Strait of Hormuz isa sa pinakaimportante nga ruta sang pangkalibutanon nga negosyo sang langis bangud madamo nga suplay sang langis sa kalibutan ang nagaagi diri.
