Ginrescue sang US Navy ship ang 21 nga mga Filipino seafarers nagikan sa M/V Tutor kag sa karun padulong na ini sa Bahrain.
Suno kay Department of Migrant Workers (DMW) Secretary Hans Cacdac, ginalauman nga maga-abot sa Port of Manama, Bahrain alas-10:30 sang gabi oras sa Pilipinas kag 5:30 sang hapon oras sa Bahrain.
Ginpahayag ni Cacdac nga isa ka team nagikan sa DMW, Migrant Workers Office (MWO) kag Overseas Workers Welfare Administration (OWWA), sa idalum sang ‘One-Country Team Approach’ nga pagapangunahan sang Philippine ambassador in Bahrain magapadulong sa Manama Port agud sag-ulawon ang 21 nga mga seafarers.
Ginsiguro naman ni Cacdac nga hatagan ang mga ini sang bastante nga bulig.
Ginhatagan man sang pagtamud ni Cacdac nga ang administrasyon ni Pangulong Ferdinand Marcos Jr, nagapatuman sang whole-of-government approach agud buligan ang mga Pinoy nga seaman nga biktima sang pagpang-atake sang Houthi rebel sa Red Sea.
Dugang pa sini nga ang Department of Foreign Affairs (DFA) nakig-angut na sa ila mga foreign counterparts para sa pagpahilway sa 17 Filipino seafarers nga ginbihag sang Houthi rebels sadtong nakaligad nga tuig.
Nagalaum man si Cacdac nga mag-angkon sang positibo nga resulta ang paghinala agud mahilway na ang mga bihag nga Filipino nagikan sa kamot sang Houthi rebels.
Ginahimuan man sa karun sang tikang agud mabalik na sa pungsod ang bangkay sang duha ka Filipino nga napatay bangud sa pag-atake sang Houthi rebels sa barko nga True Confidence.
Samtang 17 naman nga mga Filipino seafarers ang bihag sang Houthi rebels sang salakayon ang ila ginasakyan nga barko ang Galaxy Leader.
