Gintapos na ni US President Donald Trump ang pinakamalawig nga shutdown sang gobyerno sa kasaysayan sang Amerika nga naglawig sang masobra isa ka bulan.
Ini pagkatapos nga ginpirmahan ni Trump ang funding bill nga mangin kasuguan sa iya Oval Office sa White House.
Ang pagpirma sang US President natabo wala madugay pagkatapos nga ginpasar sang House of Representatives ang hagna paagi sa boto nga 222 – 209, nga may anum ka mga Democrats nga nagbuylog sa mga Republican lawmakers nga nagpabor.
Sa pagtapos sang shutdown kag liwat nga pagbukas sang gobyerno sang Estados Unidos, ang Kongreso sang Estados Unidos magabalik sa regular nga naka-iskedyul nga programa.
Magabukas man ini sang dalan para sa padayon nga pondo para sa mga federal agencies, departamento kag mga programa pareho sang pinakadaku nga anti-hunger program sang US nga Supplemental Nutrition Assistance Program (SNAP), nga nagahatag sang bulig sa pagkaon sa 42 milyon ka mga pumuluyo.
Samtang, ang pila ka mga empleyado sang federal kag mga kontraktor ginalauman man nga magabalik sa trabaho subong nga adlaw.
Igahatag man ang back pay sa ginatos ka libo ka mga empleyado nga wala pa maswelduhan halin sang nag-epekto ang shutdown sang Oktubre 1.
Ang mga airport sang Amerika nagabalik man sa normal nga operasyon apang mahimo nga maglawig ini pagkatapos nga ang Federal Aviation Administration nagmando sang pagnubo sang flight sa 40 ka pinakadaku nga mga airport sa bug-os nga US.
