Gin-anunsyo ni U.S. President Donald Trump nga magapatuman sang naval blockade ang Estados Unidos sang Amerika sa Strait of Hormuz kasunod sang kapaslawan sang peace talks sa tunga sang Iran kag pila ka mga pungsod sa Islamabad, Pakistan.
Suno kay Trump, ang US Navy gilayon nga magasugod sa pagbalabag sa tanan nga mga barko nga nagasulod kag nagaguwa sa oil port.
Katuyuan sini amo ang pagpugong sa Iran sa pagkolekta sang “illegal tolls” gikan sa mga barko.
Dugang pa ni Trump, magapakigbahin man sa blockade ang iban nga mga pungsod, kag indi pagtugutan ang Iran nga makaganar sa sitwasyon samtang apektado ang pangkalibutanon nga ekonomiya.
Nagpaandam man si Trump nga pagadakpon ukon balabagan sang US Navy ang tanan nga barko sa international waters nga ginaalegar nagabayad sang “toll” sa Iran kabaylo sang pag-agi sa Strait of Hormuz.
Ang Strait of Hormuz isa sa pinakaimportante nga pantalan sang langis sa kalibutan, kon sa diin nagaagi ang daku nga bahin sang suplay sang petrolyo sa kalibutan.
Gani, ang bisan ano nga pagbalabag sa Strait mahimo nga may mas malapad nga epekto sa pangkalibutanon nga ekonomiya.
Sa subong, wala pa sang opisyal nga kumpirmasyon gikan sa US Department of National Defense.
