Seryoso sa iya pamahog si US President Donald Trump nga liwat pagabombahon ang Iran sa tion nga indi sini pagbuksan ang Strait of Hormuz.
Ini matapos sang ginpagwa ni Trump nga 48-hour ultimatum sa pungsod Iran agud buksan kag tugutan ang tanan nga barko nga maglabay sa nasambit nga ruta.
Suno kay Bombo Marissa Pascual, International Correspondent direkta sa Estados Unidos sang Amerika, posible nga ipatuman ni Trump ang iya sini pamahog nga pagabombahon sang direkta ang bridges kag pila ka mga pasilidad sang Iran nga mahimo magtuga sang daku nga kahalitan sa pungsod.
Pahayag pa niya, nakastandby man ang military forces sang Amerika nga naka-deploy sa nagkalain-lain nga bahin sang Middle East sa tion nga magpakatig-a ang Iran.
Nahibaluan nga ang Strait of Hormuz ang isa ka makitid nga ruta sa tunga sang pungsod Iran kag Lebanon kun sa diin 20% sang supply sang produktong petrolyo ang naga-agi sa nasambit nga strait.
Bangud sa padayon nga giyera kag paghugot sang seguridad sang Iran sa amo nga dalan, nagresulta ini sang pagtaas sa presyo sang gatong sa pila ka mga pungsod sa kalibutan lakip na ang Pilipinas.
Nagalaum man ang natungdan nga magasunod ang Iran kag makighinun-anon sa Estados Unidos sang Amerika agud matapos na ang masobra isa ka bulan na nga kinagamo sa Middle East.
