ROXAS CITY – Posible nga may yara sang ginaalegar nagakahinabo nga pagdinayaay sa Estados Unidos sa nagapadayon nga US Presidential Election 2020.
Sa report ni Bombo International Correspondent Pinoy Gonzales nga may yara sang ginaalegar nagakahinabo nga anomalya ukon pagdinayaay sa tunga sang partido sang Republicans kag Democrats.
Suno kay Gonzales nga naglab-ot na sa 264 ang electoral college votes nga nakuha ni Former Vice President kag Democratic Nominee Joe Biden samtang si Incumbent Pres. Donald Trump naman may yara sang 214.
Ginpahayag sini nga ginahulat na lamang sang mga pumuluyo sang America ang mangin resulta sang lima ka mga states nga wala pa nakadeklarar sang kadalag-an sa ila ginboto nga presidente nga ginalakipan sang Alaska nga may 3 ka mga electoral college votes; Nevada nga may 8; Pennsylvania nga may 20; North Carolina nga may 15 kag Georgia nga may 15.
Sa karon, nagakinagamo na ang duha ka mga partido sang Republicans kag Democrats bangud anom na lamang ka electoral college votes ang kinahanglan ni Biden.
Bangud diri, nagdesisyon ang partido sang liberal nga isipon liwat ang boto sang pila ka mga states bangud sa ginaalegar double kag triple voting kun sa diin ginaalegar ang iban indi pa mga residente sang America.
Ginalantaw nga ang estado sang Nevada ang kontrolado sang mga Democrats kun sa diin wala ginapahanugotan ang mga Republican nga mag-obserbar sa pag-isip sang mga boto.
Mahibaluan nga nagpadulong na si Trump sa korte Suprema matapos ginaalegar nga may yara sang nagakahinabo nga pagdinayaan sa pagpatigayon sang eleksyon.
