Naka-deploy sa disputed waters ang nuclear-powered aircraft carrier sang US Navy nga USS Carl Vinson (CVN 70).
Ini ang kabahin sang routine operations sang US Navy sa tunga sang nagainit pa nga tensyon sa rehiyon sa tunga sang Pilipinas kag China matapos nga nagpabilin sang apat (4) ka adlaw kag naglibot ang ginakabig nga monster ship sang China sa kadagatan sang Zambales nga yara sa sulod sang 200 nautical miles exclusive economic zone sang Pilipinas.
Apisar suno sa PCG nakahalin na ang monster ship sang China nga ulihi nga nasiplatan sa kalayuon nga 90 nautical miles gikan sa coastline sang Zambales, may panibag-o naman nga China Coast Guard vessel ang nagbulos.
Suno sa US Department of Defense, sumugod pa sadtong Enero 3, nagapatigayon na sang routine flight operations ang Nimitz-class aircraft carrier sa ginaagawan nga kadagatan.
Nagikan ang nasambit nga US aircraft carrier gikan sa Port Klang, Malaysia sadtong nakaligad nga semana matapos ang port call sini sa Kuala Lumpur. Ang USS Carl Vinson ang may kalabaon nga 1,092 feet nga sarang magkarga sang 90 aircraft kag masobra 5,000 personnel kalakip ang crew kag air wing.
