Nag-abot na sa Middle East ang USS Roosevelt kabahin sang regular rotation sang mga pwersa militar sang Estados Unidos sa nasambit nga rehiyon.
Sa masunod nga mga adlaw, ginapaabot man nga mag-abot sa amo nga rehiyon ang duha pa ka aircraft carrier strike groups agud dugangan ang presensya sang militar sang US.
Suno sa White House, kinahanglan sang Estados Unidos nga may tatlo ka aircraft carriers sa Middle East agud mangin epektibo ang ila mga operasyon militar kon magdesisyon ini nga maglunsar sang dugang nga aksyon sa amo nga rehiyon.
Nahibaluan nga ginahingyo sang Israel ang Estados Unidos nga maglunsar liwat sang pag-atake batok sa Iran bangud nagapadayon ang nasambit nga pungsod sa pag-develop sang iya nuclear program.
Nagapabilin naman nga determinado ang Iran nga ipadayon ang iya nuclear program bisan pa sa nagapadayon nga tensyon kag pagkontra sang Israel kag Estados Unidos.
Una na nga ginpahayag sang Iran nga nagapadayon ang mga pag-istoryahanay paagi sa mga mediator sa tunga sang ila pungsod kag Estados Unidos agud mangita sang paagi nga matapos na ang kagamo sa rehiyon.
Sa pihak sini, nagapabilin ang tensyon sa Middle East bangud sa posibilidad sang dugang nga aksyon militar kag sa nagapadayon nga mga paninguha nga maresolbar ang hidwaan paagi sa diplomasya.











