Nagtimbuok ang utang sang gobyerno sang Pilipinas kon sa diin nagsaka sa P18.55 trillion sang Mayo, suno sa pinakaulihi nga report sang Bureau of the Treasury (BTr).
Nagtaas ini sang 0.41% ukon dugang nga P76.1 billion kon ipaanggid sa P18.47 trillion nga narekord sang katapusan sang Abril.
Pila sa mga mayor nga rason sang pagdamo sang utang amo ang resulta sang mas agresibo nga domestic borrowings ukon ang pag-isyu sang government securities agud pondohan ang mga programa sang estado sa pihak sang nagabag-obag-o nga mga hulag sang merkado nga tuga sang tensyon sa Middle East.
Kalabanan sa utang sang pungsod ang domestic ukon halin sa lokal nga mga bangko kag investors, samtang ang nabilin ang halin sa mga pautang sa luwas sang pungsod.
Sa pihak sini, ginpanindugan sang Bureau of the Treasury nga ang utang sang pungsod nagapabilin nga masarangan bangod sang padayon nga pag-uswag sang ekonomiya, bisan pa nga ginalauman nga magasobra ini sa P19 trillion antes matapos ang 2026.
