ROXAS CITY – Naglab-ot sa P15.35 Trillion ang utang sang Pilipinas sa bag-o nga record-high tubtob sadtong katapusan sang Mayo, suno sa Bureau of the Treasury (BTr).
Sa datos sang BTr, ang utang sang pungsod ang yara sa P15.347 trillion sadtong Mayo, nagsaka sang 2.2% ukon P330.39 billion halin P15.017 trillion sadtong Abril.
Suno sa Treasury, ang paghabok sang utang sang pungsod ang bangud sa epekto sang paghina sang local currency sa balor sang foreign-currency denominated debt.
Ginpahayag sang BTr nga ang piso ang naghina kontra sa US dollar halin P57.583:$1 sang end-April sa P58.524:$1 sang end-May.
Ang utang sang Pilipinas sadtong Mayo ang ginakalakipan sang 68.04% domestic debt kag 31.96% external debt.
Ang domestic debt ang nagabalor sang P10.442 trillion samtang ang foreign debt ang yara sa P4.904 trillion.
Suno sa Treasury, ang pagtaas sa domestic debt, sa 1.3% month-on-month, ang resulta sang P131.66 billion net issuance sang government securities kag sang P2.68 billion nga epekto sang paghina sang piso sa foreign-currency denominated domestic debt.
Sumugod sadtong nag-umpisa ang 2024, ang domestic debt sang pungsod ang nagdabong sang 4.2% ukon P424.91 billion samtang ang year-on-year growth ang yara sa 4.2% halin P9.588 trillion tubtob end-May 2023. Samtang, ang external debt ang nagtaas sang 4.2% month-on-month, samtang ang year-on-year increase ang yara sa 7.4% halin P4.565 trillion.
