MANILA, Philippines – Nagsaka sa bag-o nga pinakamataas nga lebel ang utang sang Pilipinas matapos ini mag-abot sa P18.49 trillion sang Marso 2026, suno sa Bureau of the Treasury ukon BTr.
Mas mataas ini sang halos 2 porsyento kumpara sa P18.16 trillion nga natala sang Pebrero.
Ginpahayag sang BTr nga kabahin sa nakaapekto sa pagsaka sang utang amo ang padayon nga paghuyang sang piso kag pagdamo sang pagpanghulam sang gobyerno sa sulod sang pungsod.
Suno sa report, naglig-on ang US dollar bangod sang nagalala nga tensyon kag gyera sa Middle East nga nagresulta sa pagnubo sang bili sang piso kontra dolyar.
Sang Marso 19, una nga nalab-ot sang piso ang P60 batok sa kada dolyar kag nagpadayon pa gid ini sa pagnubo tubtob P60.69 sa katapusan sang bulan.
Sa karon padayon naman nga ginabantayan sang gobyerno ang kahimtangan agud masiguro nga mapabilin nga manageable ang utang sang pungsod.
