ROXAS CITY – Patay ang 28-anyos nga utility worker sang isa ka pribado nga ospital sa Roxas City matapos nagbunggu-anay ang duha ka motorsiklo sa Barangay Balatucan, Panit-an, Capiz.
Nag-angkon sang patal nga pilas sa ulo kag lawas ang biktima nga si Eugene Delfin sang Barangay Calaan, Panit-an, Capiz.
Nagaguwa sa imbestigasyon sang Panit-an PNP nga padulong na sa ospital ang biktima para magduty sakay sa motorsiklo sang hinali nagpang-agaw sang linya sa dalan ang nakasugata nga motorsiklo nga ginamaneho sang 16-anyos nga solterito nga angkas ang magulang nga si John Bernard Valentino 18-anyos sang Barangay Lacaron, Dao, Capiz.
Ba-se sa mga nakasaksi nga gikan sa peryahan ang mag-utod kag madasig ang pagpadalagan sang menor de edad sang motorsiklo sang nagluntad ang aksidente.
Samtang gindala sa ospital ang menor de edad bangud sa naangkon nga kasamaran sa lawas.
