ROXAS CITY – Bangud sa away sa duta, utod nagbayad sang hired killer para ipapatay ang kaugalingon nga utod.
Ginabulong sa ospital ang 53-anyos nga si Vicente Estorque sang Barangay Matagnop, Dao nga nag-angkon sang pilas sa tudlo nga naglapos sa liog matapos maluthangan sang suspek nga si Arnold Frayra sang Barangay Banica, Roxas City gamit ang .45 kalibre nga armas.
Sa interview sang Bombo Radyo Roxas kay Bernard Mendoza, kaupod sang biktima sang mangyari ang insedente, naga-inum sila kaupod ang isa ka babae nga si Scarlet sang nag-agi sa ila atubang ang suspek kasunod ang pagluthang kay Vicente.
Apang sang makakita sang opurtunidad si Mendoza, gilayon ini nga ginsumbag ang suspek tobtob nag-abot ang security guard nga gilayon nagpangayo sang responde sa mga pulis.
Sa imbestigasyon sang pulisya sa suspek, gin-ako sini nga ginbayaran lamang siya ni Berto Estorque, utod sang biktima para patyon ang utod.
Nahibaluan nga nag-ugat ang away sang mag-utod bangud sa away sa lupa.
