ROXAS CITY — Magapangatubang sang kaso nga paglapas sa RA 9165 ukon Comprehensive Dangerous Drugs Act of 2002 ang high value target nga drug personality nga nadakpan sa drugbust operation sang Drug Enforcement Group sang Capiz Police Provincial Office sa Barangay Lawaan sining siyudad kagapon.
Ginkilala ang arestado nga si Joy Sison, residente sang amo man nga lugar kag ginakabig nga high value target sang pulisya sa pihak nga bag-ohanon pa lamang ini sa transaksiyon sang iligal nga droga.
Nakuha sa posesyon ni Sison ang ginabulubanta 30 gramos sang shabu nga may yara sang market value nga kapin P200-mil kag pila ka mga drug paraphernalia.
Suno kay PSSUPT. Samuel Nacion, hepe sang Capiz PPO, masobra isa ka semana nga ginpaidalum sa surveillance sang kapulisan si Sison matapos nga namonitor ini nga nagabaligya sang iligal nga droga.
Nahibaluan nga may utod man si Sison nga isa anay ka high value target drug personality apang nagapaidalum na subong sa community based drug rehabilitation program matapos nga magsungka man sadto sa Oplan Tokhang sang pulisya.
Suno pa kay Nacion nga ang ila operasyon batuk kay Sison ang kabahin na sang Oplan Double Barrel Reloaded kag nagapakita nga pursigido ang kapulisan nga matapna ang iligal nga droga sa probinsiya.
