ROXAS CITY – Nagahulat pa ang Vallacar Transit Inc. sang pag-aprubar ni City Mayor Ronnie Dadivas para sa pagbalik-biyahe sang ila mga ceres bus.
Ini ang ginpahayag sang Admin Manager nga si Janice Original sang mainterview sang Bombo Radyo.
Suno diri nga matapos ang ila pagpakigsapol sa alkalde sang siyudad, ginhambalan ini kun ano ang ila mga dapat ma-comply para makabalik sa pagbiyahe ang mga ceres bus.
Kalakip diri ang pagsumiter sang letter of request, pagtumod sang mga bus number kag plate number sang mga units nga magabalik sang biyahe kag ang special permits gikan sa Land Transportation Franchising and Regulatory Board (LTFRB).
Ginpasalig man suno diri sang administrador sang siyudad nga gilayon sila magatawag pananglitan nga maaprubahan na ini ni Dadivas.
Suno kay Original nga may kapin 51 tanan ka mga ceres bus units ang magabalik sa biyahe pananglitan nga mapahanugutan na sila sang alkalde.
Nagpangayo man ini sang pasaylo sa publiko bangud sa pagkaatrasar sang ila pagbalik-biyahe bangud aminado ini nga wala sila nakahibalo nga may mga kinahanglan pa sila nga ma-comply sa lokal nga gobyerno sang siyudad.
Gindugang pa ni Original nga may pagsaka man sa pletehan sang ceres bus kun sa diin para sa non-aircon units, P11 ang minimum nga plete kag dugang nga P1.85 para sa succeeding kilometers samtang sa air-conditioned units naman, P13 ang minimum nga plete kag P2.20 para sa succeeding kilometers.
