ROXAS CITY – Nagapangatubang sa karon sa kaso nga paglapas sa Republic Act 9165 ukon Comperehensive Dangerous Drugs Act of 2002 ang duha ka mga persona nga nadakpan sa drug buybust operation sang Capiz Police Provincial Office – Provincial Drug Enforcement Unit sa Rizal Street, Barangay 7, Roxas City.
Ginkilala ang arestado nga sanday Dave Fiolog, sang Dorado Subdivision, Barangay Inzo Arnaldo Village kag Robert Olano, sang Sitio Lag-it, Barangay Bilao, Sapian, Capiz.
Sa interview sang Bombo Radyo Roxas kay Police Inspector Gilbert Gervero, nadakpan sa akto sang mga kapulisan si Fiolog nga nagpakig-transaksiyon sang ilegal nga droga kay Olano sa sulod mismo sang iya nga van.
Narekober ang apat ka sachets sang ilegal nga droga sa mga arestado kag P1, 000 nga marked money.
Ginpahayag pa ni gervero nga madugay ang ila nga monitoring kay Fiolog antes ginkasa ang operasyon.
