ROXAS CITY – Mangin komportable kag mapawa ang vegetable section sa sulod sang Teodoro Arcenas Trade Center (TATC) para sa mga manugbaligya kag manugbakal.
Ini ang ginpahayag ni Mrs. Heloise Mendoza, Market Administrator sang TATC sang mainterview sang Bombo Radyo.
Suno diri, pagakay-uhon subong nga bulan ang nasambit nga lugar kag bag-o gid lamang natapos ang pagsaylo sang mga manugbaligya sang utan sa relocation site nga makit-an sa tunga- karsada sang duwa ka edepisyo sang TATC.
Nagpatigayon naman sang clearing operation ukon pagpanglimpyo sang mga nabilin nga basura agud masuguran na ang pagkay-o.
Mas o menus 90 ka mga vendors nagikan sa phase 2 sang main building sang TATC ang nagsaylo kun sa diin nagpahamtang man ang mga ini sang ila kaugalingon nga puwesto.
Pahamtangan naman sang roll up door ang pagakay-uhon nga nga seksyon agud masiguro ang seguradad sang ila negosyo.
Ginsiling pa ni Mendoza nga ginabulubanta 90 diyas ang konstruksyon sini kag wala man sang pagdugang sa pagpanukot sa renta sang mga vendors.
Sa pihak nga bahin, suno diri ginpakay-o naman ni Mayor Ronnie Dadivas ang mga kanal sa guwa sang TATC gani indi na ini mangin problema sa mga manugbaligya kun tig-ululan.
Ginsiling ni Mendoza, wala man sila nagauntat paalinton sa mga vendors nga magsuksok sang facemasks kag sundon ang intsakto nga paghaboy sang basura.
