Personal nga nagreklamo sa talatapan sang Punong Barangay sang barangay 8, sining syudad ang isa ka vendor nga ginapahayag nabiktima sang peke nga kwarta sa Teodoro Arcenas Trade Center (TATC).
Sa interview sang Bombo Radyo kay Punong Barangay Holce Bialen sang Barangay 8, ginpahayag sini nga nagpadulong kag nagpabalhag sa iya talatapan ang amo nga vendor kun sa diin ginapahayag nga nabiktima ini sang isa ka lalaki nga nagbakal sa iya baligya sang balor nga P50.
Dugang pa sini, ginbayaran ini sang P1,000 bill kag ginsinsilyohan nya ini sang P950.
Ulihi na suno natalupangdan sang vendor nga peke ang kwarta nga ginbayad sa iya sang amo nga lalaki. Nataban sa iya ang ginsinsilyo sini nga P950 kag ang ginpamaklan sini.
Sa karon, nagpatuman na sang mga nagakaigo nga tikang ang talatapan ni PB Bialen kun sa diin nagpalapta na ini sang mga pahanumdom sa amo nga merkadyo kag adlaw-adlaw nagahatag ini sang mga pahanumdom para sa mga vendors pinaagi sang paging system for announcement agud malikawan ang kasubong nga insidente.
Panugyan sini sa mga vendor, maghalong kag usisaon sang mayad ang mga kwarta nga ginabayad sang manugbakal, bukas man ang iya talatapan anuman nga oras, indi magduha-duha nga magpadulong kag magpabalhag sa iya talatapan kun mabiktima sang mga manugtunto nga nagabakal gamit ang peke nga kwarta.
