ROXAS CITY – Okay man madayon, okay man indi.
Ini ang pahayag sang isa ka vendor sang Roxas City may kaangtanan sa ginaduso ni Negros Occidental third district Rep. Javier Miguel Benitez nga House Bill 10591 nga naga-postpone sang Barangay kag Sangguniang Kabataan Elections sa Nobyembre 2, 2026 kag patigayunon sa Nobyembre 2028.
Sa interview sang Bombo Radyo kay alyas Gina, iya ginpahayag nga wala man siya sang problema kun ano ang mahisugtan nga petsa sang eleksyon.
Ang luyag lamang niya amo nga mangin patas ang mga barangay officials sa paghatag sang ayuda kag unahon ang mga pigado.
Nahibaluan nga ang pagduso sang postponement ni Benitez ang bangud sa ginapangatubang sang Pilipinas nga international energy emergency gikan sa padayon nga conflict kag instability sa Middle East nga amo ang rason sang nagataas nga presyo sang gatong nga nagaapekto sa mga pumuluyo sang pungsod.
