ROXAS CITY – Ginpabutyag sang isa ka vendor ang ila bahin sa gulpi nga pagtaas sa presyo sang sibuyas, sa merkado.
Sa interview sang Bombo Radyo kay ‘Bingbing’ vegetable vendor sa Teodoro Arcens Trade Center (TATC) ginpahayag sini nga sa iya 15-katuig nga pagbaligya sa merkado, subong pa lang ini nakaeksperyensiya nga tig-P300 na ang kada kilo sang sibuyas, puti man ini ukon pula nga sadto anay tig-P220 kada kilo.
Ginpakigbahin sini nga gamay malang ang ila ginansya sa pagbaligya sang P300 nga kada kilo nga sibuyas bangud ginabakal nila ang kada sako nga may napulo ka kilo sang P2,650, apang kun limpyohan na nagadangat nalang sang 9 kilos.
Nagapabilin man ang presyo sang iban nga panakot kaangay sang bawang-P100 kada kilo kag kamatis-P70.
Samtang, nagbarato man ang lipid sang mantika sa P35 kag nagnubo naman sa P69 kada kilo sang brown sugar.
Indi man mahibaluan sang vendor ang rason sa gulpi nga pagtaas sa presyo sang sibuyas, bangud mahal man ang ila kuha sa Pangasinan ukon sa Mindoro.
