ROXAS CITY – Gintuad sang Market Admin sang TATC nga ginaplano sang city government nga ihalin sa TATC ang mga vendors nga nagabaligya sa guha sang Burgos Talipapa.
Sa interview sang Bombo Radyo kay Ms. Heloise Mendoza, Market Administrator sang Teodoro Arcenas Trade Center (TATC), ginsiling niya nga ang nasambit nga plano may kabangdanan sa nagahaluga nga restriksyon sang Covid-19 gani mahimo na magbalik sa sulod sang merkado publiko ang mga vendors.
Suno diri, ginpasugtan lamang ang mga vendors magbaligya sa guha sang Burgos Talipapa bangud man sa pagginutok nila sa sulod sang mekado sadtong nakaligad kun sa diin mataas ang kaso sang nasambit nga virus.
Apang sa karon, ginpahayag ni Mendoza nga indi na matolerar ang mga nagabaligya sa guha kun sa diin naperwisyo man ang mga motorista bangud pila sa mga vendors, ginaakupar ang mga linya nga dapat agyan sang mga salakyan.
Dugang pa sang Administrador, wala nila ginadumilian ang pagbaligya sa Burgos Talipapa sang mga vendors nagikan sa TATC kag ginsiling nga kun maayo ang ila baligya, pagabaklon ini sang manugbakal gani indi rason nga basulon ang mga vendors sang TATC nga nagabaligya pa kada hapon sa Burgos Talipapa.
Suhestiyon sini, magbaligya sang preska kag maayo nga produkto agud damu ang magbakal bangud kun manami ang imo produkto nga ginabaligya, dasig ini maubos apisar damu sang kakumpetensya.
Luyag man ipalab-ot ni Mendoza sa mga tagreklamo nga maghanda na lamang sa posible nga paghalin sa ila sa madason nga semana bangud ini nga plano sang gobyerno ang para man sa ikaayo sang manugbakal kag manugbaligya kun sa diin mangin centralized kag organisado ang pagnegosyo.
