Nag-atubangay na ang TV host-actor nga si Vic Sotto kag director sang kontrobersiyal nga pelikula nga “The Rapists of Pepsi Paloma” nga si Daryll Yap sa Muntinlupa Regional Trial Court Branch 205.
Nag-abot sa korte si Yap takna alas-8:00 sang aga. Wala ini naghatag sang pahayag sa kaso bangud indi ini allowed nga mag-react angut diri.
Wala nagdugay, nag-abot man si Sotto kaupod ang misis sini nga si Pauleen Luna kag iya abogado apisar wala man ini naghatag sang pahayag natuhoy sa kaso.
Gindinig subong nga adlaw ang writ of habeas data nga ipinitesyon sang kampo ni Sotto. Ini ang una nga kahigayunan nga kapwa present ang 2 sa pagdinig sa korte matapos nga mag-file ang aktor sang 19 nga numero sang cyber libel batuk kay Yap.
Matandaan nga nag-ugat ang kaso matapos nga ginpaguha ang una nga teaser sang kontrobersiyal nga pelikula nga naka-relate sa kabuhi sang nagtaliwan nga sikat nga aktres sang dekada ’80 nga si Pepsi Paloma ukon Delia Dueñas Smith sa matuod nga kabuhi.
Ginpaguha ang teaser video sang Enero 1 nga gilayon naman nga nag-viral matapos ma-mensyonar ang pangalan sang TV host bilang rapist ni Paloma.
Kaangut sini, ginhinyo ni Sotto ang pagpaguha sang writ of habeas data sang Enero 7. Kun panigan man ini sang korte, pagamanduan si Yap sang korte nga i-take down ukon itama ang pila ka porsiyon sang teaser nga gin-kwestyon sang kampo ni Sotto.
Samtang, nagapabilin naman nga positibo ang director nga si Daryll Yap nga maipaguwa sa mga sinehan ang iya pelikula nga nakatalana nga i-release sa Pebrero.
